Tveir fullorðnir og tvö börn létust þegar skip sem flutti farandverkafólk sökk nærri Dunkirk í Frakklandi.
Fram kemur á BBC að björgunaraðgerðir hófust fyrr í dag eftir að skipið tók að sökkva.
Tvö börn, fimm og átta ára að aldri, og tveir fullorðnir, karl og kona, eru látin. Fimmtán hafa verið fluttir á sjúkrahús. Björgunaraðgerðir eru yfirstandandi úti fyrir strönd Dunkirk.
Ofsaverður er á Ermarsundi og aðstæður til björgunar erfiðar. Fjögur frönsk björgunarskip, belgísk leitarþyrla og franskur togari hafa tekið þátt í björgunaraðgerðum í dag.
Yfir 7.400 farandverkamenn hafa komið til Bretlands á minni skipum yfir Ermarsund það sem af er ári.