Verkefni þar sem hundar eru notfærðir til að þefa uppi kórónuveiruna á flugvellinum í Helsinki þykir hafa gefið góða raun og hefur reynst vinsælt hjá ferðamönnum. Þetta tilkynntu vísindamennirnir sem standa að verkefninu í dag.
Þrír hundar hafa þefað af sýnum sem tekin hafa verið úr 2.200 farþegum frá því verkefnið hófst fyrir um mánuði. Hafa þeir fundið veirusmit í 0,6% farþeganna.
Þó ekki sé búist við að rannsóknin klárist fyrr en í desember þá segir hópurinn að fyrstu niðurstöður samsvari nokkuð vel þeirri tíðni smita sem hefðbundin PCR-próf hafa numið á vellinum.
„Við höfum gert 16 til 17 þúsund PCR-próf á flugvellinum og færri en eitt prósent hafa reynst jákvæð,“ sagði Timo Aronkyto, aðstoðarborgarstjóri Vantaa, á blaðamannafundi í dag.
Sagðist hann ekki telja að tölfræðilegur munur væri á niðurstöðum hundanna annars vegar og hefðbundna sýnatökuferlisins hins vegar.
Nú skoðar hópurinn hvort niðurstöðurnar séu í raun þær sömu, það er hvort hundarnir hafi skynjað veirusmit hjá sömu farþegum og greindust smitaðir í PCR-prófunum. Vonast þeir til að kynna niðurstöðurnar fyrir lok þessa árs.
Tilraunir í fyrstu bylgju faraldursins fyrr á árinu bentu til þess að hundar gætu skynjað veirusmit með nærri 100% vissu, og allt að fimm dögum fyrr en PCR-próf.
Hægt væri að byrja að nýta hunda við að þefa uppi veirusmit hér á landi innan fárra mánaða ef ákvörðun væri tekin um það, sagði hundaþjálfarinn Jóhanna Þorbjörg Magnúsdóttir í samtali við mbl.is í síðasta mánuði.
Hún hefur meðal annars þjálfað hunda í mygluleit og er sannfærð um gagnsemi ferfætlinganna við að leita uppi veiruna.