Leitaði skjóls á krá og lést af sárum sínum

Grátið eftir árás. Frá vettvangi fyrir utan kirkjuna í morgun.
Grátið eftir árás. Frá vettvangi fyrir utan kirkjuna í morgun. AFP

Christian Etrosi, borgarstjóri Nice þar sem þrír voru myrtir í og við Notre Dame basilíkuna í morgun, kallar eftir því að kirkjur um allt landið fái aukna öryggisgæslu eða þeim verði lokað til að koma í veg fyrir frekari árásir.

Innanríkisráðherrann Jean Castex hefur tilkynnt þinginu að hann hafi ákveðið að færa viðbúnaðarstigið í landinu upp í það hæsta í kjölfar árásarinnar.

Saksóknarar hryðjuverkamála í landinu hafa hafið rannsókn á árásinni, sem Etrosi kennir við „íslamófasisma“.

Skotinn af lögreglu

„Hann hélt áfram að endurtaka „Allahu Akbar“ (a. guð er meiri), jafnvel þegar búið var að gefa honum lyf,“ tjáði borgarstjórinn blaðamönnum á vettvangi, en árásarmaðurinn var skotinn af lögreglu og særðist alvarlega.

Maðurinn hafði ráðist til atlögu í basilíkunni um klukkan níu í morgun. Náði hann að myrða þar karl og konu. Önnur kona lést svo af sárum sínum eftir að hafa leitað skjóls á krá sem stendur við hlið kirkjunnar, samkvæmt heimildum AFP-fréttaveitunnar.

Heim­ild­ar­menn fjöl­miðla eru nú ekki á einu máli um hvort önn­ur kvenn­anna hafi verið af­höfðuð eða hún skor­in á háls. Dagblaðið Le Monde hermir að árásarmaðurinn hafi ráðist á hana inni í kirkjunni, skorið hana á háls og reynt að afhöfða hana.

Myrt fleiri en 250 manns

Viðbúnaðarstigið hefur verið hátt í Frakklandi allt frá því hryðjuverkamenn réðust inn á skrifstofur skoptímaritsins Charlie Hebdo í janúar árið 2015. Réttarhöld yfir fólki sem grunað er um tengsl við þá árás standa yfir um þessar mundir í höfuðborginni París.

Íslamskir hryðjuverkamenn hafa myrt fleiri en 250 manns í Frakklandi frá 2015 og til dagsins í dag.

Þar af létust 86 manns þegar íslamisti keyrði flutningabíl í gegnum mikinn fólksfjölda sem saman var kominn á göngugötu í Nice á þjóðhátíðardegi Frakka 14. júlí 2016. 

Aðeins nokkrir dagar eru liðnir frá því þúsundir manna víða um landið þustu út á götur til að votta samúð sína og stuðning eftir að kennarinn Samuel Paty var afhöfðaður fyrir að hafa sýnt nemendum sínum skopmyndir af íslamska spámanninum Múhameð.

Emmanuel Macron Frakklandsforseti hefur síðan lofað aðgerðum gegn íslamskri öfgatrú í landinu, meðal annars með því að loka moskum og samtökum sem sökuð eru um að kynda undir öfgahyggju og ofbeldi.

Lögreglan skaut og særði árásarmanninn alvarlega.
Lögreglan skaut og særði árásarmanninn alvarlega. AFP

Árás við franska ræðismannsskrifstofu

Þær fyrirætlanir hafa síðan vakið mótmæli í nokkrum löndum þar sem íslömsk trú er ríkjandi.

Recep Tayyip Er­dog­an, for­seti Tyrk­lands, hefur til að mynda hvatt landa sína til að sniðganga all­an varn­ing frá Frakklandi í ljósi hertra aðgerða gegn rót­tæk­um íslam­ist­um.

Og í morgun særði Sádi-Arabi ör­ygg­is­vörð við ræðismanns­skrif­stofu Frakk­lands í borg­inni Jedda. Var öryggisvörðurinn fluttur á sjúkrahús en þykir ekki í lífshættu.

1.450 ár frá fæðingu Múhameðs

Yfirvöld í Tyrklandi, Ítalíu, Bretlandi og Vatíkaninu eru á meðal þeirra sem þegar hafa sagst fordæma árásina.

1.450 ár eru í dag frá fæðingu spámannsins Múhameðs. Hann fædd­ist árið 570 í Mekka og lést 8. júní árið 632 í Med­ínu.

mbl.is

Bloggað um fréttina