Frakkland „í stríði við íslamska öfgastefnu“
Franska lögreglan hefur tekið höndum mann sem talinn er hafa verið í samskiptum við íslamistann sem myrti þrjá með hrottafengnum hætti í kirkju í Nice í gær. Þetta herma heimildir AFP.
Maðurinn, sem er 47 ára, var tekinn í varðhald seint í gær.
„Hann var ekki á neinum eftirlitslista, hvorki frönskum né evrópskum,“ sagði innanríkisráðherrann Gerald Darmanin um árásarmanninn í dag.
Árásarmaðurinn á sjúkrahúsi
Ítrekaði hann að Frakkland ætti „í stríði við íslamska öfgastefnu“, óvin sem sé bæði að innan og utan.
„Og þegar þú ert í stríði, þá verðurðu að skilja að því miður, þá hafa orðið og verða önnur tilvik eins og þetta,“ sagði ráðherrann í samtali við útvarpsstöðina RTL.
Árásarmaðurinn, 21 árs Túnisi að nafni Brahim Aouissaoi, er á sjúkrahúsi eftir að skot lögreglu hæfðu hann nokkrum sinnum.
Macron heldur neyðarfund
Emmanuel Macron Frakklandsforseti heldur neyðarfund með helstu ráðherrum ríkisstjórnar sinnar í dag. Hann hefur þegar fyrirskipað að herinn gæti kirkna og annarra staða í aðdraganda allraheilagramessu á sunnudag.
Margar kaþólskar fjölskyldur heimsækja þá grafreiti, sem enn verða opnir þrátt fyrir nýjar samgöngutakmarkanir sem tóku gildi í dag.