Drýgði hetjudáð en brenndist alvarlega
Setja bókamerki
Rúmenskur læknir brenndist alvarlega við að bjarga sjúklingum með Covid-19 úr eldsvoða á sjúkrahúsi um helgina. Hann hefur verið fluttur á sjúkrahús í Belgíu.
Forsætisráðherra Rúmeníu, Ludovic Orban, sagði að dr. Catalin Denciu hefði unnið hetjudáð við að bjarga sjúklingum út úr brennandi sjúkrahúsinu í Piatra Nemat á laugardag. Orban segir að Denciu hafi sýnt einstakt hugrekki og fórnað sér í þeirri von að geta bjargað lífi annarra.
Tíu sjúklingar létust er eldurinn kom upp á gjörgæsludeild sjúkrahússins. Rannsókn er hafin á upptökum eldsins en hann breiddist fljótt út í nærliggjandi rými sjúkrahússins.
Talið er að mögulega hafi kviknað í lækningatæki með þeim afleiðingum að eldurinn komst í súrefniskút á deildinni.
Að sögn borgaryfirvalda var gjörgæsludeildin flutt af þriðju hæð sjúkrahússins á hæðina fyrir neðan án þess að það hafi verið tilkynnt til yfirvalda.
Sjö karlar og þrjár konur á aldrinum 67-86 ára létust í eldsvoðanum. Sex aðrir sjúklingar með Covid-19 slösuðust í eldsvoðanum og voru fluttir á sjúkrahús í borginni Iasi.
Denciu var fluttur á hersjúkrahús í Belgíu en áður hafði hann verið fluttur á sjúkrahús í höfuðborg Rúmeníu, Búkarest. Hann er með þriðja stigs brunasár á 40% líkamans.
Forseti Rúmeníu, Klaus Iohannis, segir eldsvoðann skelfilegan atburð og mikilvægt sé að komast að því hvað gerðist. Með því verði vonandi hægt að koma í veg fyrir að sagan endurtaki sig.
Gígbarmurinn hækkað frá því í gær
Væri að ljúga ef ég segðist ekki stressaður
Skemmtiferðaskip hætt komið nærri Viðey
Eyjafjarðarbraut lokað vegna alvarlegs umferðarslyss
Vélsleðaslys: Þyrlan kölluð út á mesta forgangi
Shakespeare fannst í skókassa
„Umsátursástand“
Skar höfuðleðrið af íslenskri konu