Kona sem var handtekin vopnuð hnífi í stórverslun í Sviss í gær tengdist hryðjuverkarannsókn lögreglunnar þar í landi fyrir þremur árum.
Konan, sem er 28 ára gömul, stakk konu í hálsinn og reyndi að kyrkja aðra konu í versluninni í Lugano að sögn lögreglu. Önnur konan er alvarlega særð eftir árásina.
Alríkislögreglan segir í færslu á Twitter að konan hafi áður verið til rannsóknar í tengslum við hryðjuverkarannsókn. Áður hafði lögreglan sagt að mögulega hefði árásin í gær verið hryðjuverkaárás.
„Ástandið er grafalvarlegt,“ segir Norman Gobbi, yfirmaður héraðsstjórnarinnar í Ticino. Yfirmaður alríkislögreglunnar, Nicoletta della Valle, segir að árásin hafi ekki komið á óvart. Slíkar árásir séu gerðar út um allan heim.
Gestir í versluninni höfðu yfirbugað konuna áður en lögreglan kom á vettvang.