Peter Altmaier, viðskiptaráðherra Þýskalands, segir að harðar aðgerðir kunni að halda áfram til næsta sumars takist ekki að ná stjórn á útbreiðslu veirunnar þar í landi. Þetta kom fram í viðtali Altmaiers við þýska dagblaðið Die Welt.
Sagði hann ekki hægt að létta takmörkunum meðan það væru hátt í 50 sýkingar á hverja 100 þúsund íbúa í stórum hluta landsins.
„Það eru þrír til fjórir langir mánuðir fram undan. Það er vel mögulegt að aðgerðirnar sem nú eru í gildi verði áfram óbreyttar fyrstu mánuði ársins 2021,“ var haft eftir Altmaier.
Angela Merkel, kanslari Þýskalands, herti aðgerðir verulega í landinu á miðvikudag. Skemmtistöðum og veitingastöðum hefur verið gert að skella í lás. Þó eru verslanir áfram opnar og skólar sömuleiðis.