Ghislaine Maxwell, sem er sökuð um mansal, sækist eftir því að verða látin laus gegn 28,5 milljón dollara, jafnvirði 3,6 milljarða króna, tryggingu. Hennar bíða réttarhöld vegna meintra kynferðisbrota en Maxwell er sökuð um að hafa ítrekað útvegað fyrrverandi kærasta sínum, barnaníðingnum Jeffrey Epstein, stúlkur sem voru undir lögaldri. Hún er sökuð um að hafa útvegað Epstein stúlkur, allt niður í 14 ára gamlar, en hann framdi sjálfvíg í fangelsi á síðasta ári.
Maxwell, sem er dóttir fjölmiðlamógúlsins sáluga Roberts Maxwell, neitar því að hafa stundað mansal og lokkað til sín tugi ólögráða stúlkna. Hún á að koma fyrir dóm í New York næsta sumar.
Hún vonast til að losna úr fangelsinu og vill snúa til síns heima, þar sem vopnaðir verðir gætu gætt heimilis hennar. Dómari mun taka beiðni hennar fyrir í lok árs.
Maxwell á yfir höfði sér allt að 35 ára fangelsi verði hún fundin sek um meinta glæpi frá árunum 1994 til 1997. Hún er einnig sökuð um að hafa stundum tekið þátt í því að misnota stúlkurnar.