Erlent | mbl | 6.1.2021 | 11:56

Stjórnar rannsókninni í Ask

Bjørn Andre Tronier, lögmaður lögreglunnar í Raumaríki, sem stjórna mun rannsókn jarðfallsins í Ask, segir margra mánaða vinnu fram undan. Auk tæknilegra orsaka verði farið ofan í saumana á byggingaráætlunum sveitarfélagsins, en sérfræðingur, sem mbl.is ræddi við á gamlársdag, varaði eindregið við því árið 2008 að byggt yrði á svæðinu þar sem jarðvegurinn gaf sig. Ljósmynd/Lögreglan í Raumaríki

Bjørn Andre Tronier, lögmaður lögreglunnar í Raumaríki í Noregi, mun stjórna rannsókn sem ætlað er að leiða í ljós hvað olli jarðfallinu í Ask aðfaranótt 30. desember í fyrra sem staðfest er að hafi kostað sjö manns lífið, en þriggja er enn saknað á hamfarasvæðinu.

„Við munum skoða hvað það var sem gerðist og eins verkferla sem tengjast skipulagningu byggðar á svæðinu,“ segir Tronier í samtali við norska ríkisútvarpið NRK, en mbl.is ræddi á gamlársdag við Steinar Myrabø, fyrrverandi sérfræðing norsku járnbrautanna í jarðvegsburðarþoli, sem árið 2008 bað stjórnendur Gjerdrum þess lengst allra orða að breyta deiliskipulagi svæðisins og falla frá fyrirætlunum um byggingu þeirra húsa sem nú eru rústir einar, þar sem jarðvegurinn þyldi ekki þungann.

Fara yfir ógrynni af skjölum

„Við erum að byrja núna,“ segir Tronier um rannsóknina sem hann stjórnar og gerir þann fyrirvara að margra mánaða vinna sé fram undan áður en nokkru verður slegið föstu um hvað raunverulega gerðist í Ask aðfaranótt næstsíðasta dags liðins árs.

„Við erum um það bil fimm sem sinnum þessu sem fullu starfi á næstunni, hópnum var raðað niður í dag [í gær] og eins og hann lítur út núna eru þar fjórir rannsakendur og tveir lögfræðingar,“ segir Tronier frá.

Ókræsilegt er um að litast í Ask þar sem þriggja íbúa svæðisins er enn saknað, en staðfest er úr því sem komið er að sjö hafi látið lífið í jarðfallinu aðfaranótt 30. desember. AFP

Hann segir verkefnið sem bíði hópsins mjög mikið að umfangi. Fara þurfi yfir ógrynni af skjölum auk þess að leita eftir fjölda sérfræðiálita um jarðfræðilega og annars konar tæknilega þætti.

Yfir 110.000 búa á ótraustu undirlagi

Norska vatna- og orkustofnunin NVE telur að allt að ár muni líða þar til íbúum í Ask, sem þurftu að rýma heimili sín um áramótin, verði óhætt að flytja til baka auk þess sem nýjar tölur stofnunarinnar frá því á föstudag sýna að yfir 110.000 íbúar Noregs búa í húsum byggðum á ótraustum jarðvegi, eða kvikkleire eins og það heitir.

Lars Løkeland Slåke, verkfræðingur hjá NVE, segist þó telja að sú tala sé enn hærri, þetta sé aðeins það sem stofnun hans hafi formlega kortlagt sem slík svæði.

NRK

Romerikes Blad

Nettavisen