102 smit rakin til heilsufyrirlesara

Grímuklætt fólk í borginni Wuhan í Kína. Þar greindist kórónuveiran …
Grímuklætt fólk í borginni Wuhan í Kína. Þar greindist kórónuveiran fyrst seint á árinu 2019. AFP

Kínversk heilbrigðisyfirvöld segjast hafa rakið 102 kórónuveirusmit til „ofurdreifara“ veirunnar, 45 ára gamals karlmanns sem ferðaðist um norðausturhluta landsins og flutti fyrirlestra um heilsu. 

Guardian greinir frá þessu í lifandi fréttastreymi.

73 ný kórónuveirusmit voru skráð í héraðinu Jilin, sem deilir landamærum með Norður-Kóreu, þar af 63 einkennalaus tilfelli. Öll nema eitt einkennalausu tilfellanna má rekja til mannsins sem ferðaðist um í lestum í Harbon, höfuðborg Heilongjiang-héraðs, og borgunum Changchun, Tonghua og Gongzhuling, sem allar eru í Jilin. 

Kínverskir miðlar greindu frá því að maðurinn hefði haldið fjóra fyrirlestra í tveimur heilsuklúbbum í Gongzhuling og Tonghua frá 8. til 11. janúar. 

Veiran á uppleið í Kína

79 þeirra 102 smita sem rekja má til mannsins komu upp á meðal fólks sem mætti á fyrirlestra hans. Hin 23 smitin komu svo upp hjá aðilum sem tengdust þeim sem á fyrirlestrana mættu. 

Kína tekst nú á við mikinn uppgang faraldursins og hefur ástandið ekki verið svo slæmt síðastliðna tíu mánuði. Fleiri en 100 tilfelli hafa verið tilkynnt í Kína sex daga í röð. Faraldurinn er alls ekki í jafn miklum hæðum og í byrjun síðasta árs en kínversk yfirvöld hafa áhyggjur af þróun mála.

mbl.is