Hulunni svipt af egypskum fornmunum

Leitin að fornmunum í Egyptalandi tekur seint enda og á dögunum var hulunni svipt af fjölda fornmuna sem fundust við Saqqara grafreitinn sem stóð við hina fornu höfuðborg Memfis. Þar á meðal var 3000 ára gamall sarkófagi.  

Í Saqqara var fjöldi pýramída, mustera og dýragrafreita. Það var fornleifafræðingurinn Zahi Hawass sem fer fyrir uppgreftrinum og hann segir munina og byggingarnar sem hafa fundist í Saqqara vera afar merkilega og varpa nýju ljósi á fornmenningu Egypta. Fleiri en 50 sarkófagar úr timbri hafa fundist en þeir eru frá 16.-11. öld fyrir Krist.

Alls hafa fundist 22 grafhýsi í Saqqara í uppgreftrinum. „Ein þeirra tilheyrði hermanni og við fundum öxina sem hann notaði í bardögum,“ segir Hawass í samtali við AFP fréttaveituna. 

Þá fannst sarkófagi úr steini og fimm metra langur papírus með sautjánda kafla í Bók hinna dauðu, grímur, trébátar og heimildir um leiki Egypta til forna. Fundurinn þykir ekki síst merkilegur fyrir þær sakir að vanalega finnast heimildir og fornminjar á svæðinu sem eru um þúsund árum yngri.

Einungis er talið að um 30% af fornmunum á svæðinu hafi komið ljós og því er enn mikið verk fyrir höndum.