Lögreglan í Þrændalögum í Noregi hefur svipt mann á þrítugsaldri ökuleyfi til bráðabirgða auk þess að gera bifreið hans upptæka eftir að hann varð uppvís að akstri á 288 kílómetra hraða miðað við klukkustund í Soknedalsgöngunum, 3,6 kílómetra löngum jarðgöngum í Midtre Gauldal þar sem hámarkshraðinn er 80, í nóvember.
Upp komst um brotið, akstur á rúmlega 200 kílómetra hraða yfir leyfðum hámarkshraða, þegar barnabörn Ninu Bratt Staverløkk, bæjarfulltrúa í Midtre Gauldal, bentu henni á myndskeið á samfélagsmiðlinum Tik Tok sem ökumaðurinn hafði tekið af stafrænum hraðamæli bifreiðar sinnar meðan á akstrinum stóð og að sjálfsögðu deilt því um lýðnetið.
Staverløkk féll allur ketill í eld og dreifði myndskeiðinu á Facebook hjá sér og leið ekki á löngu uns það náði augum lögreglu.
„Við lítum málið mjög alvarlegum augum. Akstur bifreiðar á þessum hraða hefur stórhættu í för með sér, hvort tveggja fyrir ökumanninn og aðra vegfarendur,“ segir Jannicke Evjen Olsen, lögmaður lögreglunnar í Þrændalögum, í samtali við norska ríkisútvarpið NRK.
Frode Tiller Skjervø, talsmaður norsku umferðaröryggissamtakanna Trygg Trafikk í Þrændalögum, kveður tiltæki ökumannsins hreina firru. „Þetta er algjör bilun. Fæst fólk áttar sig á því hve mikill hraði þetta er, hann er á pari við Formúlu-1-kappakstur og það er hrein vitfirring að nokkur maður aki svo hratt á almennum vegum í Noregi,“ segir Skjervø.
Lögregla rannsakar nú bifreið ökumannsins með það fyrir augum að afhjúpa hvort þar sé komin sama bifreið og notuð var við brotið og hvort hraðinn, sem hraðamælirinn sýndi, hafi verið hinn raunverulegi hraði bifreiðarinnar.
Ökumaðurinn hefur sætt yfirheyrslu auk þess sem rætt hefur verið við eitt vitni vegna málsins. Verði hinn grunaði sekur fundinn um háttsemina bíður hans óskilorðsbundinn fangelsisdómur og líkast til þriggja ára ökuleyfissvipting.