Tilvonandi faðir frá bænum Liberty í New York-ríki vestanhafs lést eftir að tæki sem hann smíðaði vegna kynjaveislu, þar sem gestum er greint frá kyni barns, sprakk.
Hinn 28 ára Christopher Pekny var að setja tækið saman þegar það sprakk, rétt fyrir hádegi á sunnudag.
Samkvæmt lögreglu lést Pekny við sprenginguna og bróðir hans var fluttur slasaður á sjúkrahús.
Eldri bróðir Pekny sagði í samtali við New York Times að um fáránlegt slys hefði verið að ræða. Hvorki hann né lögregla greindu frá því nákvæmlega um hvernig tæki hefði verið að ræða.
Í umfjöllun BBC kemur fram að kynjaveislur hafi áður valdið miklum skaða og eru skógareldar í Kaliforníu síðasta haust nefndir í því samhengi.