Illa gengur fyrir frönsk og þýsk yfirvöld að sannfæra þegna sína um að bóluefni AstraZeneca sé jafn áhrifaríkt og önnur bóluefni við kórónuveirunni. Birgðir af bóluefninu hafa hlaðist upp í báðum löndum.

Aðeins er búið að nota 273.000 AstraZeneca-skammta í Frakklandi en í lok febrúar voru 1,7 milljón skammtar af bóluefninu komnir til landsins. Virðist ekki breyta miklu að fólk í markhópum, það er heilbrigðisstarfsmenn 50 ára og eldri og fólk með alvarlega sjúkdóma, getur látið bólusetja sig hjá heimilislækni í stað þess að fara í sérstakar bólusetningamiðstöðvar.

Í Þýskalandi verða þær raddir sífellt háværari sem vilja breytingar á röðun á forgangslista þar sem 23. febrúar voru komnir 1,45 milljón skammtar af AstraZeneca til landsins en aðeins búið að nota 240 þúsund þeirra. Er nú þrýst á að kennarar og starfsmenn leikskóla verði bólusettir fljótlega, það er færðir úr forgangshópi 3 í hóp númer 2. 

Hvorugt landið hefur mælt með notkun bóluefnis AstraZeneca fyrir þá sem eru 65 ára og eldri.