Bandarísk stjórnvöld eru sögð ætla að beita víðtækum refsiaðgerðum gegn Rússum. Um verður að ræða hefndaraðgerðir vegna netárása sem hafa beinst að Bandaríkjunum, þar á meðal meint afskipti af forsetakosningunum á síðasta ári.
Refsiaðgerðunum, sem verða hugsanlega settar á í dag, er beint að yfir 30 rússneskum aðilum. Þar á meðal stendur til að vísa að minnsta kosti 10 manns frá Bandaríkjunum, að því er BBC greindi frá. Á meðal þeirra verða erindrekar.
Í samtali sem Joe Biden Bandaríkjaforseti átti við Vladimir Pútín, forseta Rússlands, á þriðjudag sagði hann að Bandaríkin muni bregðast við af krafti til að vernda þjóðarhagsmuni.