Íbúar grísku eyjunnar Elafonisos eru bjartsýnir á sumarið og telja að þangað muni margir ferðamenn koma enda engin Covid-smit á eyjunni og búið að fullbólusetja meirihluta fullorðinna íbúa hennar.

Eyjan er skammt fyrir utan Pelópsskagann og búa þar um eitt þúsund manns. Íbúafjöldinn margfaldast á sumrin enda eyjan þekkt fyrir fallegar sandstrendur.

Grikkir undirbúa nú ferðamannatímabilið en miðað er við 14. maí. Mikil áhersla hefur verið lögð á að bólusetja eyjaskeggja á þeim eyjum í Jóna- og Eyjahafi þar sem fullorðnir íbúar eru færri en eitt þúsund.

Grísk yfirvöld tilkynntu í síðustu viku að ferðamenn frá ríkjum Evrópusambandsins og fimm ríkja til viðbótar sem eru bólusettir við Covid-19 eða geta framvísað neikvæðu PCR-vottorði við komuna þyrftu ekki að fara í sóttkví við komuna til landsins. Þar í landi hefur verið lögð mikil áhersla á bólusetningar enda ferðamannaiðnaðurinn afar mikilvæg atvinnugrein.