Erlent | AFP | 30.4.2021 | 7:41

Hagvöxtur og aflétting aðgerða

Hagvöxtur mældist í Frakklandi á fyrsta ársfjórðungi og þrátt fyrir að hann væri minni en spár höfðu gert ráð fyrir kom hann samt á óvart vegna harðra sóttvarnareglna sem þar hafa gilt undanfarna mánuði.

Mældist hagvöxturinn 0,4% á fyrstu þremur mánuðum ársins samkvæmt tilkynningu frá Hagstofu Frakklands. Spá hagstofunnar hafði hljóðað upp á 1% hagvöxt en þá var ekki tekið tillit til þess að nánast öllu var skellt í lás vegna fjölgunar smita þar í landi.

Forseti Frakklands, Emmanuel Macron, kynnti í gær hvernig yrði staðið að afléttingum sóttvarnareglna á næstunni. Kaffihús, menningarmiðstöðvar og önnur starfsemi sem hefur verið lokað vegna Covid-19 má opna að nýju 19. maí.

Um er að ræða áætlun í fjórum liðum.

3. maí mega nemendur í gagnfræðaskólum og framhaldsskólum mæta í skólann í eigin persónu. Frelsi til ferðalaga verður virkjað á ný.
19. maí verður reglum um útgöngubann að næturlagi breytt. Það er að það gildir frá klukkan 21 í stað 19 í dag. Kaffihús og veitingastaðir mega taka á móti gestum utandyra. Verslanir sem selja annað en nauðsynjavöru fá að opna, sem og kvikmyndahús, söfn og leikhús.
9. júní verður útgöngubannið fært til 23. Eins verða kynntir „heilbrigðispassar“ fyrir þá sem ætla að mæta á stóra og fjölmenna viðburði sem og fyrir erlenda ferðamenn sem koma til landsins.
30. júní verður útgöngubanninu aflétt en næturklúbbar verða lokaðir áfram.