Benjamín Netanjahú, forsætisráðherra Ísraels, hefur frest þar til miðnættis í kvöld að staðartíma til þess að mynda ríkisstjórn. Ef ekki verður úr stjórnarviðræðum hans gæti forseti landsins veitt öðrum flokki stjórnarmyndunarumboðið. CNN greinir frá þessu.
Netanjahú hefur meðal annars reynt að semja við leiðtoga Yamina-flokksins, Naftali Bennett. Bennett hefur hins vegar hafnað boðum Netanjahús, en meðal þess sem Netanjahú bauð Bennett var víxlseta þeirra í forsætisráðherraembættinu.
Aðild Bennetts og flokks hans að ríkisstjórn Netanjahú myndi samt ekki duga til þess að tryggja forsætisráðherranum meirihluta á þingi Ísraelríkis, Knesset. Einnig þyrfti hann annað hvort stuðning stakra þingmenn stjórnarandstöðunnar eða flokks strangtrúarmanna.
Stuðningur Sameinaða arabalistans við mögulega stjórn Netanjahús kemur líklega í veg fyrir að strangtrúarmenn vilji starfa með honum, en þeir hafa hingað til útilokað að sitja í sömu stjórn og Sameinaði arabalistinn.
Ef fresturinn rennur út í kvöld getur Netanjahú beðið forseta Ísraels, Reuven Rivlin, um tveggja vikna framlengingu á samningstímabilinu. Þá er talið mögulegt að Rivlin gæti neitað Netanjahú um slíkan frest og í staðinn veitt Yair Lapid umboðið.
Lapid, formaður næststærsta flokksins á þinginu, hefur sjálfur verið að semja við formenn hina flokkana, þar á meðal Naftali Bennett.
Kosið var á ísraelska þingið í fjórða sinn á tveimur árum 23. mars og hefur Netanjahú sem sitjandi forsætisráðherra enn ekki tekist að mynda starfandi ríkisstjórn. Viðloðandi stjórnarkreppa hefur verið í Ísrael síðan vorið 2019 þegar ekki tókst að mynda ríkisstjórn eftir þingkosningar.
Eftir tvær aðrar þingkosningar í viðbót tókst Netanjahú að mynda ríkisstjórn með Bláhvíta bandalaginu. Sú ríkisstjórn féll innan árs vegna deilna um fjárlög ríkisins.