Joe Biden forseti Bandaríkjanna hefur heitið því að setja skýrar línur fyrir Vladimír Pútín Rússlandsforseta á leiðtogafundi þeirra tveggja í Genf á miðvikudaginn.
Þetta kom fram í máli Bidens eftir leiðtogafund Atlantshafsbandalagsins í dag. Biden lýsti Pútín sem klárum en harðskeyttum leiðtoga og „verðugum keppinaut“. Biden sagðist ekki vera á höttunum eftir deilum við Rússa en að Bandaríkin myndu bregðast við létu Rússar ekki af skaðvænlegum aðgerðum.
Pútín kallaði Biden framagosa sem hefði gert stjórnmál að ævistarfi í viðtali við NBC. Hann gerði þess vegna ráð fyrir færri hvatlyndisákvörðunum í forsetatíð Bidens en hann hefði vanist í tíð forvera hans Donalds Trumps. Þótt Pútín væri hlynntur þeirri yfirvegun hrósaði hann Trump og sagði hann hæfileikaríkan mann með litríkan persónuleika.