Tölvuveiruvarnafrumkvöðullinn John McAfee fannst látinn í fangaklefa sínum á Spáni í dag og hefur dómsmálaráðuneyti Spánar gefið út að allt bendi til þess að hann hafi svipt sig lífi. Fangaverðir reyndu að endurlífga McAfee án árangurs.
Fyrr í dag úrskurðuðu spænskir dómstólar að hann skyldi framseldur til Bandaríkjanna vegna skattsvika. Frá þessu greinir fréttastofa BBC.
McAfee hafði áður verið á flótta undan bandarískum yfirvöldum vegna ákæra um umfangsmikil skattvik og hélt hann til á Dalvík um tíma, þar til í ágúst árið 2019, en hann yfirgaf Bandaríkin í janúar sama ár.
McAfee er einna þekktastur fyrir að hafa stofnað vírusvarnarfyrirtæki, sem nefnt er í höfuðið á honum sjálfum, auk þess sem hann var um tíma grunaður um morð á nágranna sínum í Belís, en sá var bandarískur kaupsýslumaður. McAfee hefur ávallt neitað sök í málinu.
Í október 2020 var McAfee handtekinn á Spáni og sakaður um að hafa stundað skattsvik í fjögur ár en hann hafði þá auðgast vel meðal annars á rafmyntum og ráðgjafavinnu.
Þá var hann einnig grunaður um að hafa svikið undan skatti með því að hafa greitt laun sín inn á reikninga, þar af rafmyntareikninga, undir fölskum formerkjum, auk þess að hafa skráð eignir sínar undir annarra manna nöfnum, svo sem snekkju og fasteignir.