Lögregluþjónn í New York hefur hlotið mikið lof fyrir störf sín á vettvangi er hann kom manni til bjargar sem hafði orðið fyrir stunguárás í Harlem 7. júlí. Aðferðin sem hann beitti til að draga úr blæðingu mannsins hefur vakið sérstaklega mikla athygli.
Þegar lögregluþjónninn Ronald Kennedy kom á vettvang var manninum að blæða út. Brá Kennedy þá á það ráð að nota snakkpoka og límband til að draga úr blæðingunni. Frá þessu er greint í umfjöllun BBC.
Á upptöku úr búkmyndavél lögregluþjónsins má sjá hvernig hann fær gangandi vegfarendur til að aðstoða sig við björgunina.
Maðurinn sem var stunginn liggur þungt haldinn á spítala eftir árásina en ástand hans er talið stöðugt.