Fimm barna móðir vann 31 milljón króna

Fimm barna bandarísk móðir, sem starfar sem sendill fyrir Uber Eats, hafði heldur betur heppnina með sér þegar hún vann vinning sem hljóðar upp á 250 þúsund bandaríkjadali (31,5 milljónir króna) á skafmiða í Maryland-lottóinu í Bandaríkjunum fyrir nokkrum vikum.

Vinningshafinn, sem kýs að halda nafnleynd, sat í bílnum sínum á milli sendiferða í vinnunni þegar hún áttaði sig á því að hún hefði unnið stóra vinninginn, samkvæmt frétt fréttastofunnar CNN.

„Ég var að missa vitið þarna inni í bílnum!“ segir hún í samtali við starfsfólk Maryland-lottósins.

„Ég kíkti í appið í símanum og sá að vinningurinn hljóðaði upp á 250 þúsund bandaríkjadali.“

Móðirin var, eins og við má búast, í skýjunum með fréttirnar.

„Ég sagði við sjálfa mig: Ég vil ekki sendast með mat lengur!“

Vinninginn fékk hún á svokallaðan CASH-skafmiða þar sem stærsti vinningurinn var einmitt 250 þúsund bandaríkjadalir en miðinn sjálfur kostaði aðeins 10 bandaríkjadali.

Samkvæmt upplýsingum frá Maryland-lottóinu kaupir umrædd kona sér reglulega skafmiða sem hún skefur inni á milli sendinga hjá Uber Eats. 

Þá hefur hún áður fengið nokkra smærri vinninga á skafmiða en kvartmilljónin er klárlega langstærsti vinningurinn sem hún hefur fengið.

Konan hyggst nota vinninginn til að borga reikninga, styðja fjárhagslega við börnin sín og upp í útborgun á nýju húsi.

• Blogga um frétt