Fógetaembættið í Mariposa-sýslu í Kaliforníu stendur á gati eftir að fjölskylda fannst látin ásamt hundi sínum á fáfarinni gönguleið. Líkamsleifar John Gerris, konu hans, Ellen Chungs, eins árs dóttur þeirra, Muji, og hunds þeirra urðu nývegið á vegi annarra göngumanna.
Fjölskylduvinur þeirra tilkynnti um hvarf þeirra á mánudag.
„Þetta eru mjög óvenjulegar og einstakar kringumstæðir,“ er haft eftir Kristie Mitchell, talskonu fógetans í Moriposa-sýslu, í umfjöllun dagblaðsins San Francisco Chronicle.
„Það eru engin merki um banamein þeirra, engin augljós dánarorsök, ekkert sjálfsmorðsbréf. Þau voru úti í miðri auðn í þjóðgarði á göngu.“
Rannsóknarlögregla telur mögulegt að einhvers konar eiturefni hafi orðið þeim að bana, eitthvað gas úr nærliggjandi námu eða þá eitraðir þörungar. Svæðið allt er nú girt af sem hættu- og spilliefnasvæði á meðan rannsókn málsins stendur yfir.
Svæðið var þekkt á 19. öld fyrir gullgröft að því er fram kemur í skjölum frá samtökum sagnfræðinga sem sérhæfa sig í sögu svæðisins.
Fjölskyldunni er lýst sem mjög jarðbundinni og vel liðinni, góðu fólki sem stundaði útivist og tók þátt í félagslífinu í Mariposa-sýslu.
„Málið er nú til rannsóknar réttarmeinafræðings,“ segir áðurnefnd Kristie Mitchell og bætir við: „Við höfum engin svör. Þetta er klárlega stórundarlegt.“