Colin Powell látinn

Powell var fyrsti blökkumaðurinn sem gegndi embætti utanríkisráðherra Bandaríkjanna en hann tók við því embætti árið 2001 þegar George W. Bush var kjörinn forseti og hann átti stóran þátt í að móta utanríkismálastefnu landsins í lok 20. aldar og byrjun þeirrar 21.

„Colin L. Powell, hershöfðingi, fyrrverandi utanríkisráðherra og yfirmaður herráðsins, lést í morgun af völdum fylgikvilla Covid-19,“ segir í tilkynningu fjölskyldunnar. Fram kom að Powell hefði verið fullbólusettur gegn kórónuveirunni. 

Powell gegndi herþjónustu í Víetnamstríðinu og varð fyrsti blökkumaðurinn til að gegna embætti öryggisráðgjafa Bandaríkjaforseta í forsetatíð Ronalds Reagans. Þá varð hann einnig fyrsti blökkumaðurinn til að gegna embætti yfirmanns herráðsins í forsetatíð Georges H.W. Bush. Vinsældir hans jukust mjög í kjölfar Persaflóastríðsins í byrjun 10. áratugar síðustu aldar og var talinn líklegur forsetaframbjóðandi fyrir Repúblikanaflokkinn. En orðstír hans beið hnekki þegar hann flutti ræðu árið 2003 á fundi öryggisráðs Sameinuðu þjóðanna og fullyrti ranglega að Írakar byggju yfir efnavopnum. Powell sagði sjálfur síðar, að þetta væri „blettur“ á ferilskrá hans.