Innanríkisráðherra Frakklands hefur aflýst fyrirhuguðum fundi með breska innanríkisráðherranum, Priti Patel, eftir að forsætisráðherra Bretlands óskaði eftir því að Frakkar tækju aftur við flóttafólki sem færi yfir Ermarsundið til Bretlands.
Boris Johnson, forsætisráðherra Bretlands, skrifaði Emmanuel Macron, forseta Frakklands, bréf þar sem hann óskar eftir því að frönsk stjórnvöld taki þegar í stað við öllum því flóttafólki sem kom til Englands eftir að hafa siglt yfir Ermarsund. Að minnsta kosti 27 flóttamenn drukknuðu í gær skammt undan strönd Calais í Frakklandi, sem er eitt mannskæðasta sjóslys sem þar hefur orðið.
Gérald Darmanin, innanríkisráðherra Frakklands, segir Frakka hafa orðið fyrir miklum vonbrigðum með þessa kröfu og opinber birting bréfsins hefði gert málið enn verra.
Málið þykir hið viðkvæmasta fyrir leiðtogana, en mjög hefur færst í vöxt að flóttfólk og hælisleitendur reyni að komast yfir Ermarsundið, þ.e. frá Frakklandi yfir til Bretlands.