Erlent | AFP | 10.12.2021 | 10:54 | Uppfært 11:13

Heimilt að framselja Assange til Bandaríkjanna

AFP

Yfirréttur í Bretlandi hefur komist að þeirri niðurstöðu að það sé heimilt að framselja Julian Assange, stofnanda Wikileaks, til Bandaríkjanna. Áfrýjunardómstóllinn hefur þar með snúið við dómi á neðra dómstigi.

Fram kemur í erlendum fjölmiðlum að þetta þyki vera mikið högg fyrir Assange, sem er fimmtugur Ástrali, sem hefur í áraraðir reynt að komast hjá framsali, en hann er m.a. sakaður um njósnir í Bandaríkjunum.

Lögmenn Assange hafa tök á að áfrýja niðurstöðunni.

Í janúar komst breskur héraðsdómari að þeirri niðurstöðu að Assange yrði ekki framseldur vegna áhyggja um geðheilsu hans og að sú hætta væri fyrir hendi að hann myndi reyna sjálfsvíg í bandarísku fangelsi.

Bandarísk stjórnvöld hafa viljað draga Assange fyrir dómstóla í Bandaríkjunum fyrir að hafa árið 2010 birt leynileg skjöl bandaríska hersins um stríðreksturinn í Afganistan og Írak.

Tveggja daga vitnaleiðslur fóru fram í október þar sem bandarískir lögmenn héldu því fram að dómarinn sem kvað upp sinn úrskurð í janúar hefði ekki tekið almennilega til greina aðra vitnisburði sérfræðinga sem höfðu metið geðheilsu Assange.

Þá reyndu þeirra að sannfæra dómstólinn um að Assange yrði ekki vistaður á einangrun í hámarksöryggisfangelsi og að hann myndi hljóta viðeigandi meðferð.

Í kjölfar niðurstöður yfirréttarins þá fer málið aftur til meðferðar hjá héraðsdómi. Stella Moris, unnusta Assange, segir að málinu verði áfrýjað sem fyrst.

Málið gegn Assange hefur staðið yfir í áratug þar sem stuðningsmenn Assange halda því fram að Wikileaks eigi sama rétt og aðrir fjölmiðlar til að birta leyniskjöl sem varða almannahagsmuni.

Stuðningsmenn Assange fjölmenntu fyrir utan dómstólinn í dag, veifuðu spjöldum og kröfuðust lausnar hans, en Assange hefur setið á bak við lás og slá í öryggisfangelsi í suðausturhluta London.

Ákæra bandarískra yfirvalda á hendur Assange er í 18 liðum sem tengjast birtingu Wikileaks á um 500.000 leyniskjölum varðandi þátttöku Bandaríkjanna í stríðsátökunum í Afganistan og í Írak.

Verði Assange framseldur, réttað yfir honum og hann sakfelldur, þá gæti hann átt yfir höfði sér 175 ára fangelsi.

Hann hefur verið í haldi frá árinu 2019, þrátt fyrir að hafa tekið út refsingu fyrir að hafa brotið gegn skilorði í öðru máli. Áður dvaldi hann alls í um sjö ár í sendiráði Ekvador í London til að komast hjá því að hann yrði framseldur til Svíþjóðar þar sem hann var ásakaður um kynferðisbrot. Það mál var síðar fellt niður.