Að minnsta kosti tólf eru látnir og nokkrir slasaðir eftir mikinn troðning við helgidóm í Kasmír-héraði á Indlandi í gærkvöldi.
Talið er að nokkur þúsund manns hafi verið á leið að helgidómi í héraðinu þegar atvikið átti sér stað.
Narendra Modi, forsætisráðherra Indlands, sagðist sorgmæddur yfir atvikinu og vonaði að þeir sem slösuðust næðu sér að fullu.
Samkvæmt AFP-fréttastofunni tróðst fólk undir þegar það mættist á þröngum stíg á leið að helgidómnum í myrkri í gærkvöldi.
Þar kemur enn fremur fram að tala látinna gæti hækkað vegna þess mikla fjölda sem var á ferðinni.