Kanadískur læknir tók á móti „kraftaverkabarni“ í næturflugi til Úganda.
Dr. Aisha Khatib, prófessor við Toronto-háskóla, hafði verið í um klukkutíma í háloftunum með Qatar Airways frá Doha, höfuðborg Katar, til Entebbe í Úganda þegar kallið kom.
Farandverkakona frá Úganda á leið frá heim til sín frá Sádi-Arabíu var um það bil að fara að fæða sitt fyrsta barn eftir að hafa verið komin 35 vikur á leið, að því er BBC greindi frá.
Barnið kom heilbrigt í heiminn og var nefnt Miracle Aisha í höfuðið á lækninum.
„Ég sá fólk safnast saman í kringum sjúkling,“ sagði Dr. Khatib við BBC News. Þá hélt hún að eitthvað alvarlegt hefði gerst á borð við hjartaáfall.
„Þegar ég kom nær sá ég þessa konu liggjandi í sætinu með höfuðið í átt að ganginum og fæturna í átt að glugganum. Og barnið var að koma út!“
Is there a doctor on the plane? 🙋🏽♀️👩🏽⚕️Never thought I’d be delivering a baby on a flight! ✈️ @qatarairways Thanks to the airline crew who helped support the birth of this Miracle in the air! Mom and baby are doing well and healthy! #travelmedicine pic.twitter.com/4JuQWfsIDE
— Aisha Khatib, MD (@AishaKhatib) January 13, 2022
Tveir aðrir farþegar aðstoðuðu lækninn við að taka á móti barninu, eða hjúkrunarkona og barnalæknir.
Eftir að hún hafði tekið á móti barninu lét hún það í hendur barnalæknisins til nánari skoðunar. Í kjölfarið klöppuðu farþegar vélarinnar ákaft fyrir stúlkubarninu fallega.