Að minnsta kosti 19 létu lífið eftir að slagsmál brutust út í næturklúbbi í bænum Sorong í Indónesíu sem urðu þess valdandi að eldur kviknaði í staðnum.
Eitt fórnarlambið lést vegna stunguárásar en 18 til viðbótar létust í brunanum.
Næturklúbburinn brann næstum til kaldra kola en á vettvangi mátti einnig sjá farartæki sem lá þar fyrir utan, brunnið og illa leikið.
„Slagsmálin brutust út í gærkvöldi klukkan 11. Þetta var framhald af átökum sem hófust á laugardag,“ sagði yfirlögreglustjórinn Ary Nyoto Setiawan í yfirlýsingu.
Í slagsmálunum, sem voru milli tveggja mismunandi þjóðernishópa, komu meðal annars við sögu sveðjur, örvar og Molotov-kokteilar.
Hafa lögregluyfirvöld nú þegar verið í samráði við trúarlega leiðtoga á svæðinu um hvernig megi koma í veg fyrir frekari átök milli hópanna en þau sem brutust út á laugardag byggðu á einhvers konar misskilningi, að sögn yfirlögreglustjórans.
Hafa lögregluyfirvöld í Sorong nú fengið liðsauka til að aðstoða við að halda frið á svæðinu.