Átta látið lífið í Ástralíu vegna flóða

Átta hafa látið lífið í úrhellisrigningunni í Ástralíu sem hefur valdið gríðarmiklum flóðum. Íbúar hafa margir þurft að flýja upp á húsþök sín vegna vatnsflæmis og hefur tugþúsundum verið gert að yfirgefa heimili sín vegna þeirra.

Veðurstofan í Ástralíu hefur varað við því að hætta sé á lífshættulegum skyndiflóðum við Kyrrahafs-strandlengjuna.

Þá hafa milljónir Ástrala í Queensland fengið þau tilmæli að halda sig heima og tæplega þúsund skólum hefur verið lokað tímabundið vegna flóðanna.

Tugþúsundum hefur verið skipað að flýja heimili sín. AFP

Klifraði upp á þak til að fá hjálp

Í bænum Lismore vaknaði Danika Hardiman, einn íbúanna, við að moldarbrúnt vatn hafði náð alla leið upp að svölum íbúðar hennar sem var á annarri hæð. Hún ásamt maka hennar brugðu á það ráð að klifra upp á þak hússins þar sem björgunarmenn á kajak urðu varir við þau og gátu sent eftir hjálp.

„Ímyndaðu þér, þú ert á bát að sigla framhjá þökum fólks,“ sagði Hardiman í samtali við blaðamenn. „Það hræðilega er að þetta er bara byrjunin, það er mun meiri rigning í vændum,“ bætti hún við.

43 þúsund íbúum bæjarins var gert að yfirgefa heimili sín í morgun en talið er að vatnshæðin hafi ekki enn náð hámarki, sem þeir telja að verði 14 metrar. Þetta eru verstu flóð sem íbúar bæjarins hafa upplifað.

Borgin Maryborough í Queensland. AFP

Óska eftir aðstoð á samfélagsmiðlum

Neyðarþjónustur voru undir miklu álagi vegna símhringinga og hafa því einhverjir íbúar reynt að óska eftir aðstoð á samfélagsmiðlum, m.a. bæjarstjórinn Steve Krieg.

„Ef einhver er með bát og getur farið á Engine Street, þá er þunguð kona þar sem situr á þakinu sínu. HJÁLP,“ sagði hann í færslu á Facebook í morgun.

Þá hafa björgunarmenn farið með þyrlu um svæðið í von um að ná þeim íbúum sem eru strandaðir á húsþökum.

Björgunarmenn með bát. AFP

• Blogga um frétt