Mikill fjöldi fólks hefur neyðst til að flýja heimili sín í Úkraínu frá því að Rússar réðust inn í landið fyrir viku. Nærri níu hundruð þúsund manns eru þegar taldir hafa yfirgefið Úkraínu samkvæmt upplýsingum Sameinuðu þjóðanna.
Gert er ráð fyrir að sendinefndir beggja ríkja komi saman til friðarviðræðna á landamærum Póllands og Hvíta-Rússlands í dag, en ekkert varð af fyrirhuguðum viðræðum í gærkvöldi.
Antony Blinken, utanríkisráðherra Bandaríkjanna, mun á komandi dögum ferðast til Belgíu, Póllands, Eystrasaltsríkjanna og Moldavíu til að ítreka stuðning stjórnvalda í Washington við Úkraínu, að því er ráðuneyti hans greindi frá í gærkvöldi.
Á blaðamannafundi sagði hann að „ögrandi orðræða“ Vladimírs Pútíns Rússlandsforseta um kjarnavopn væri „hámark ábyrgðarleysis“, en forsetinn setti kjarnavopnasveitir landsins í viðbragðsstöðu á sunnudag. „Þetta er hættulegt. Þetta eykur hættuna á misreikningi. Þetta þarf að forðast,“ sagði Blinken.
Emmanuel Macron Frakklandsforseti ávarpaði þjóð sína í sjónvarpsútsendingu í gær og sagðist myndu ræða við Pútín eins oft og þyrfti, til að fá hann til að stöðva stríðið. Þeir ræddust síðast við á mánudag í níutíu mínútur.
Macron tjáði þjóð sinni í ávarpinu að nýtt skeið væri hafið í Evrópu eftir innrás Rússlands í Úkraínu og að álfan þyrfti að fjárfesta í vörnum sínum og sjálfstæði í orkumálum.
„Nú þegar hefur Evrópa okkar sýnt einingu og staðfestu. Við erum komin inn í nýtt skeið,“ sagði forsetinn. En hann varaði sömuleiðis við: „Komandi dagar munu að líkindum verða erfiðari og erfiðari.“
Rússar sögðust í gær hafa hertekið hafnarborgina Kerson. Ef rétt reynist er stórborgin sú fyrsta í Úkraínu sem þeir hafa náð á sitt vald. Allsherjarþing SÞ samþykkti þá að krefjast þess að rússneskt herlið yfirgæfi landið tafarlaust.