Úkraínumenn segja Rússa vera „að reyna að tortíma“ þeim hermönnum sem eftir eru í stálverksmiðjunni Azovstal í borginni Maríupol.
Verksmiðjan er síðasta vígi úkraínska hersins í borginni. Að sögn Úkraínumanna hefur Rússum tekist að brjóta sér leið inn í verksmiðjuna.
„Rússneskir hermenn eru að reyna að hindra og tortíma úkraínskum hermönnum á Azovstal-svæðinu,“ sagði úkraínski herinn í yfirlýsingu.
„Með aðstoð úr lofti héldu Rússar áfram sókn sinni til að ná stjórn á verksmiðjunni.“
Yfirlýsing kom eftir að Rússar tilkynntu að vopnahlé ætti að hefjast við verksmiðjuna, þar sem hundruð úkraínskra hermanna og einhverjir almennir borgarar hafa setið fastir í margar vikur.
Úkraínskur hershöfðingi sem hefur yfirumsjón með úkraínska hernum í Maríupol, sagði seint í gær að rússneskir hermenn hefðu komist inn í verksmiðjuna og að þar væru í gangi „blóðugir bardagar“.
Volodimir Selenskí, forseti Úkraínu, bað aðalritara Sameinuðu þjóðanna, Antonio Guterres, í gær um aðstoð við að bjarga hersveitum sínum í Azovstal og að flytja þá særðu á brott.