Erlent | mbl | 24.5.2022 | 22:37

„Hversu mörg börn þurfa að deyja?“

15 fórnarlömb eru þegar látin í árásinni og árásarmaðurinn einnig. Fjöldi barna og starfsmanna skólans liggja nú á sjúkrahúsi, þar á meðal er 10 ára stúlka og 66 ára kona. WIN MCNAMEE

„Þingið verður að grípa til aðgerða. Ríkisstjórar og þingmenn verða að koma á skynsamlegum lögum um byssueign strax.“

Þetta sagði Sylvester Turner, borgarstjóri Houston-borgar í Texas, í ávarpi sínu vegna skotárásarinnar sem átti sér stað í Robb-grunnskólanum í Uvalde í Texas í kvöld.

Frétt af mbl.is

14 skólabörn látin í skotárás í Texas

Þar sagðist hann vera bæði miður sín og uggandi yfir árásinni og vottaði fjölskyldum fórnarlambanna samúð sína.

Þá biðlaði hann til kjósenda að krefjast þess af kjörnum fulltrúum að koma á almennilegum lögum til að takmarka byssueign í Bandaríkjunum.

„Hversu mörg börn þurfa að deyja vegna glórulauss byssuofbeldis?“

Hvergi annars staðar

Í bandaríska þinginu hélt þingmaðurinn Chris Murphy frá Connecticut ræðu í svipuðum tóni:

„Börnin okkar búa við stöðuga hræðslu við að stíga fæti inn í kennslustofu því þau gætu verið næst,“ sagði hann og bætti við:

„Þetta gerist aðeins í þessu landi og hvergi annars staðar. Hvergi annars staðar fara börn í skólann og hugsa að þau gætu verið skotin.“

15 fórnarlömb eru þegar látin í árásinni og árásarmaðurinn einnig. Fjöldi barna og starfsmanna skólans liggja nú á sjúkrahúsi. Þar á meðal er 10 ára stúlka og 66 ára kona.