Gráu bætt ofan á svart í Afganistan

Rauði krossinn og rauði hálfmáninn eru mættir á svæðið í Afganistan þar sem að minnsta kosti þúsund manns létust í nótt vegna jarðskjálfta en talan hækkar með hverjum tímanum sem líður.

Frétt af mbl.is

Yfir þúsund fundist látnir

Skjálftinn sem reið yfir var 6,1 að stærð og er með þeim mannskæðustu í sögunni. Afganski Rauði hálfmáninn með stuðningi Alþjóðasambands Rauða krossins og Rauða hálfmánans (IFRC) er nú þegar á staðnum og starfsfólk og sjálfboðaliðar frá nálægum deildum sinnir þar neyðarstarfi.

Afganski Rauði hálfmáninn starfrækir deildir í öllum 34 héruðum Afganistan og er með fleiri en 30.000 sjálfboðaliða úr röðum heimafólks sem sinnir ýmsu sjálfboða starfi. Brynhildur Bolladóttir, upplýsingafulltrúi Rauða krossins á Íslandi, segir þetta sýna fram á mikilvægi þess að hafa fólk til staðar sem geti brugðist strax við.

Grátt bætist ofan á svart

Hægt er að segja að gráu sé bætt ofan á svart í Afganistan en jarðskjálftinn bætist ofan á aðrar hörmungar þar í landi. Meira en 50% Afgana eru í mikilli þörf fyrir mannúðaraðstoð vegna ýmissa hamfara eins og átaka, þurrka og annarra öfga í veðri tengdum hlýnun jarðar, gríðarlegra efnahagserfiðleika, laskaðs heilbrigðiskerfis og lélegra innviða. 

Þá má einnig nefna að jafnrétti og önnur mannréttindi í landinu hafa sjaldan staðið jafn höllum fæti eftir að Talíbanar náðu völdum þar. 

Biðlar Brynhildur til fólks að leggja sitt að mörkum í formi styrkja til Rauða krossins.

Yfir þúsund manns eru látnir eftir jarðskjálfta í Afganistan og enn fleiri slasaðir. AFP

Mörg hús eru illa leikin eftir jarðskjálftan. AFP

• Blogga um frétt