Flestir flóttamenn miðað við höfðatölu

Fimm hundruð þúsundasti flóttamaðurinn kom frá Úkraínu til Moldóvu 17. júní. Nú er fjöldinn kominn upp í rúmlega 507 þúsund. Eitt þúsund manns bætast við á dag. Moldóva er fátækt land, en þar hefur flóttamönnunum engu að síður verið tekið opnum örmum. 2,6 milljónir manna búa í landinu og er því líkt og íbúum hafi fjölgað um fimmtung frá því að Rússar réðust inn í Úkraínu. Þrátt fyrir þetta hefur lítið fari fyrir Moldóvu í fréttum þar til í vikunni þegar Evrópusambandið ákvað að landið fengi stöðu umsóknarlands um aðild að ESB. Páll Stefánsson ljósmyndari var á ferð í Moldóvu og birtist frásögn hans af ferðinni ásamt myndum í sunnudagsblaði Morgunblaðsins. Hér á eftir fer brot úr frásögninni.

Daniela Seuciuk er framkvæmdastjóri Rauða kross Moldóvu. „Merkilegt,“ segir Daniela og horfir á tölvuskjáinn, „Á morgun, 17. júní, kemur 500 þúsundasti flóttamaðurinn frá Úkraínu yfir til okkar. Í dag vantar rétt rúmlega tvö hundruð einstaklinga upp á að ná hálfri milljón. Við eigum allavega eitt met, flestir flóttamenn komnir inn til landsins miðað við höfðatölu. Um 95% flóttamannanna sem hingað hafa komið eru konur og börn. Annað sem Moldóvar hafa gert vel, betur en flestar þjóðir: Það eru hvorki fleiri né færri en 40 þúsund fjölskyldur sem hafa opnað dyr sínar fyrir flóttamönnum og boðið þeim að búa hjá sér. Já, þjóðin hefur tekið Úkraínumönnum opnum örmum, enda liggja öll suður- og austurlandamæri Moldóvu að Úkraínu.“

Moldóva, sem er þriðjungur af stærð Íslands, liggur semsagt á milli Úkraínu og Rúmeníu. Landið var áður austasta hérað Rúmeníu. Landið var hertekið af Sovétríkjunum í síðari heimsstyrjöldinni og síðan innlimað. Sovétmenn fluttu fjölda fólks til landsins og í dag eru um 40% íbúa Moldóvu rússneskumælandi.

Flóttamannamet á alþjóðadegi flóttamanna

„Það er óvenju rólegt í dag,“ segir Nurs frá Tadsíkistan, yfirmaður á stærstu móttökustöð flóttamanna í Moldóvu. Stöðin er við landamæri Úkraínu, í þorpinu Palanca sem er syðst í landinu, 175 km suður af Kisínev. Þaðan eru aðeins rúmir 40 km til Ódessu, þriðju stærstu og auðugustu borgar Úkraínu. „Það var straumur snemma í nótt, en nú er rólegt. Stríðið er búið að standa í yfir í rúmlega hundrað daga. Flestir sem vildu eða gátu farið frá Úkraínu eru komnir yfir. En þetta lítur ekki vel út. Þetta stríð virðist ætla að dragast á langinn. Það er enn mikill baráttuandi hjá Úkraínumönnum, þrátt fyrir linnulausar stórskotaárásir Rússa, sem virðast skjóta jafnt á hermenn sem og almenna borgara. Það er svo sorglegt að á morgun, 20. júní, sem er opinber alþjóðadagur flóttamanna, fer í fyrsta skipti í sögunni, á þessum degi, fjöldi þeirra yfir 100 milljónir í heiminum. Bara í þessu stríði, sem hefur staðið síðan 24. febrúar,“ segir Nurs og horfir yfir til Úkraínu, „hafa bæst við 15 milljónir flóttamanna. Þar af hafa tæplega átta milljónir Úkraínumanna flúið land. Hinir eru á flótta innanlands.“

Greinina alla eftir Pál Stefánsson er að finna í sunnudagsblaði Morgunblaðsins.