Fyrirskipar vernd þeirra sem sækja þungunarrof

Joe Biden, forseti Bandaríkjanna.
Joe Biden, forseti Bandaríkjanna. AFP

Joe Biden, forseti Bandaríkjanna, hefur undirritað forsetatilskipun til verndar þeim sem sækja þungunarrof og til að tryggja aðgang að getnaðarvörnum.

Mikill þrýstingur innan úr Demókrataflokknum hefur verið á Biden undanfarið á mótvægisaðgerðir eftir að hæstiréttur Bandaríkjanna felldi fordæmi dómsins Roe gegn Wade úr gildi og þar með stjórnarskrárbundinn rétt kvenna til að sækja þungunarrof.

Við úrskurðinn urðu þungunarrof ólögleg í nokkrum ríkjum Bandaríkjanna.

Vernd gagnvart mögulegri refsingu

Forsetatilskipunin tekur meðal annars til öruggs aðgengis að þungunarrofslyfjum. 

Þá er kveðið á um vernd kvenna gagnvart mögulegri refsingu við að sækja sér þungunarrof í öðru ríki og öruggan aðgang að getnaðarvörnum. 

Einnig er að finna skref í áttina að persónuvernd þeirra sem sækja þungunarrof.

Kveðið er á um að heilbrigðisráðherra Bandaríkjanna, Xavier Becerra, skuli skila skýrslu um framgang ofangreindra mála innan þrjátíu daga.

mbl.is