Erlent | AFP | 27.7.2022 | 23:47

Reynir að fá Griner lausa úr haldi

Antony Blinken, utanríkisráðherra Bandaríkjanna og bandaríska körfuboltakonan Brittney Griner.

Bandaríkin segjast tilbúin að gefa Rússum „gott tilboð“ ef þeir framselja tvo Bandaríkjamenn, þar á meðal körfuboltakonuna Brittney Griner til Bandaríkjanna.

Þetta tilkynnti utanríkisráðherra Bandaríkjanna, Antony Blinken, í dag. Þá sagðist hann einnig myndu tala við Sergei Lavrov, utanríkisráðherra Rússa, í fyrsta sinn síðan stríðið í Úkraínu hófst.

Játar sök en ætlaði sér ekki að brjóta lög

Meintur bandarískur njósnari fékk 16 ára dóm

Blinken sagðist búast við símtali á næstu dögum við Lavrov um tillöguna um að sleppa Griner ásamt bandaríska sjóliðanum Paul Whelan en Griner sagði við dómstól fyrr í dag að hún hefði óviljandi komið með bönnuð eiturlyf inn í Rússland.

Griner á yfir höfði sér tíu ára fangelsisvist. AFP

Fólkið „hefur ranglega verið í haldi og það verður að leyfa þeim að koma heim,” sagði Blinken við fréttamenn.

Körfuboltakona fyrir vopnasala?

Blinken neitaði þó að staðfesta fregnir um að Bandaríkin byðust til að skipta á þeim og rússneska vopnasmyglaranum Vikor Bout.

Bandaríkin og Rússland hafa nú þegar einu sinni skipst á föngum síðan stríðið í Úkraínu hófst. Í apríl fengu Bandaríkin fyrrverandi bandaríska sjóliðann Trevor Reed í skiptum fyrir eiturlyfjasmyglarinn Konstantín Jarósjenkó.