Kínverjar mögulega sekir um glæpi gegn mannkyni

Sameinuðu þjóðirnar hafa varað við því að mögulega hafa átt sér stað glæpir gegn mannkyni af hálfu Kínverja vegna meðferðar þeirra á Úígúrum í Xinjiang-héraði í Kína. Þetta kemur fram í skýrslu SÞ.

Rúmt ár er síðan Michelle Bachelet, mannréttindafulltrúi Sameinuðu þjóðanna, sagði að nauðsynlegt væri að gera úttekt á meðferð Kínverja á Úígúrum í Xinjiang-héraði, en skýrslan birtist skömmu eftir að Bachelet sagði starfi sínu lausu.

Í skýrslunni segir að umfang handahófskenndrar mismununar Kínverja á Úígúrum og öðrum múslimum í héraðinu gæti lögum og stefnum samkvæmt falið í sér alþjóðaglæpi, einkum glæpi gegn mannkyni.

Þá segir í umræddri skýrslu að ásakanir á hendur Kínverja um að pyndingar og þvingaðar læknismeðferðir af hálfu Kínverja hafi átt sér stað væru trúverðugar og að þörf væri á brýnum aðgerðum á alþjóðavettvangi.

Uppfært: 

Mbl.is barst í dag athugasemd frá sendiráðsfulltrúa í kínverska sendiráðinu á Íslandi vegna þess sem fram kemur í frétt AFP. 

„Í þessari svokölluðu úttekt eru settar fram ósannar ásakanir til þess að skaða orðspor Kína og fela í sér afskipti af innanríkismálum í Kína. Gengur það í berhögg við tilgang og gildi  Sameinuðu þjóðanna og grefur undan trúverðugleika og hlutleysis embættis mannréttindafulltrúa Sameinuðu Þjóðanna. 

Þessi svokallaða úttekt er einfaldlega farsi samin af einhverjum ríkjum á vesturlöndum og þeim sem andsnúnir eru Kína. Staðreyndir segja meira en orð og réttlætið býr í hjörtum fólksins. Á síðustu árum hafa fulltrúar frá nærri 100 ríkjum tekið til máls innan mannréttindanefndar Sameinuðu Þjóðanna og allsherjarþings SÞ og lýst yfir stuðningi við löglega afstöðu Kína og sett sig upp á móti afskiptum af innanríkismálum Kína í tengslum við Xinjiang.“

• Blogga um frétt