Erlent | mbl | 9.11.2022 | 5:35 | Uppfært 8:31

Óvæntar vendingar vestanhafs?

Starfsfólk á kjörstað í Detroit í Michigan sver eið áður en það tekur við vakt í talningunni. AFP

Ekki eru lengur taldar yfirgnæfandi líkur á að repúblikanar nái meirihluta í fulltrúadeild Bandaríkjaþings.

Þetta hefur orðið ljóst á undanfarinni klukkustund, eftir því sem sífellt fleiri atkvæði eru talin upp úr kjörkössunum vestanhafs.

Nate Cohn, sem fer fyrir stjórnmálagreiningarhópi New York Times, segir að ekki verði hægt að fullyrða um úrslitin í fulltrúadeildinni í bráð.

There's not going to be a call in the House anytime soon and the possibility of a Dem win isn't a theoretical proposition at this point.
The GOP edge depends on a lot of western races where we're not going to know the result for a while, and often where they're already behind
— Nate Cohn (@Nate_Cohn) November 9, 2022

Sigur demókrata í deildinni, þ.e. að þeir haldi meirihluta sínum, er þá ekki lengur aðeins fræðilegur möguleiki að hans sögn.

Á grafinu hér að neðan má sjá spá RealClearPolitics fyrir kosningarnar samkvæmt könnunum í aðdraganda þeirra. Talið var að repúblikanar næðu í það minnsta tiltölulega naumum meirihluta í fulltrúadeildinni.

Yfirleitt tapar flokkurinn sem er með Hvíta húsið

Öll 435 þingsæti fulltrúadeildarinnar eru undir í kosningunum, auk um þriðjungs öldungadeildarinnar, en þar er kjörtímabil þingmanna sex ár í stað tveggja í neðri deildinni.

Úrslitin eru einnig tvísýn í öldungadeildinni, en við því var búist fyrir fram.

Yfirleitt er reglan sú að sá flokkur sem heldur um taumana í Hvíta húsinu, þegar kemur að miðkjörtímabilskosningum, tapar fjölda þingsæta þar sem kjósendur reyna að tempra vald ríkjandi forseta.

Bjuggust við 15-25 sætum yfir til repúblikana

Lestu meira

Fimm lykilríki sem fylgjast þarf með

Að meðaltali hefur tapið numið 26 sætum í fulltrúadeildinni, þegar litið er allt aftur til endaloka heimsstyrjaldarinnar síðari. Að sama skapi hefur ráðandi flokkurinn að jafnaði tapað fjórum sætum í öldungadeildinni.

Kannanir þetta ár hafa að mestu gefið til kynna að sú verði einnig raunin þessu sinni.

Stjórnmálaskýrendur bjuggust fyrir fram við því að repúblikanar myndu bæta við sig 15 til 25 sætum í fulltrúadeildinni, en það myndi nægja til að tryggja flokknum völdin þar að nýju.

Fréttastofa NBC spáir því nú, á sjötta tímanum að íslenskum tíma, að repúblikanar nái 219 þingsætum. 218 sæti þarf fyrir meirihluta. Í spánni eru þó gefin skekkjumörk upp á 13 sæti, til eða frá.