Kim Jong-un, leiðtogi Norður-Kóreu, var viðstaddur þegar nýjasta flugskeyti landsins var skotið á loft í gær, ásamt dóttur sinni. Sérfræðingar hafa kallað það „skrímslaflugskeyti“, að því er kóreska fréttastofan KCNA greinir frá.
Ríkisfjölmiðlar í Norður-Kóreu hafa aldrei minnst á börn leiðtogans áður og var þetta því fyrsta opinbera staðfestingin þar í landi á því að hann ætti dóttur.
„Við höfum séð með eigin augum fjórðu kynslóð Kim-fjölskyldunnar,“ sagði Soo Kim, fyrrverandi CIA-sérfræðingur, við AFP-fréttastofuna.
Leiðtoginn lýsti því yfir að hann myndi svara kjarnorkuógnum Bandaríkjanna með eigin kjarnorkuvopnum.
Frá því að Kim lýsti Norður-Kóreu sem „óafturkræfu kjarnorkuríki“ í september hafa Bandaríkin aukið svæðisbundið öryggissamstarf.
Norður-Kórea hefur skotið fjölmörgum flugskeytum á loft á undanförnum vikum í tilkraunaskyni og greindi öryggisráð Sameinuðu þjóðanna frá því í morgun að til stæði að ræða málefni Norður-Kóreu á fundi á mánudag.