Bátur með fleiri en 180 Róhingjum innanborðs, sem hefur verið á reki í meira en mánuð, hefur loks fengið leyfi fyrir nokkra farþega til þess að fara frá borði í Indónesíu.
Einstaklingarnir eru flóttamenn sem lögðu af stað frá Suður-Bangladess 25. nóvember. Sex dögum síðar bilaði vél bátsins og rak hann þá í vesturátt, úr lögsögu Malasíu yfir í lögsögu Indónesíu og þaðan í Indlandshaf.
Fjölskyldur flóttamannanna gátu einstaka sinnum hringt í bátsverjana, og ásamt flóttamannaaðstoð Sameinuðu þjóðanna biðluðu þau til yfirvalda í Indónesíu og á Indlandi að aðstoða fólkið.
Róhingjarnir sögðust vera deyja úr hungri, og þá höfðu þegar margir dáið.
Indverski sjóherinn gaf þeim mat og vatn og dró bátinn til baka í lögsögu Indónesíu, þar sem bátinn rak í sex daga í viðbót áður en Róhingjarnir fengu leyfi til þess að fara frá borði, tæplega tvö þúsund kílómetrum frá staðnum þar sem báturinn fór frá landi.
BBC greinir frá því að um sé að ræða annan bátinn sem hefur komið til héraðsins Aceh í Indónesíu á tveimur dögum.
Fólkið verður tímabundið vistað hjá ríkisstofnun.
Snemma í mánuðinum sökk bátur með öðrum 180 Róhingjum innanborðs.
Róhingjar, sem eru flestir múslímar, hafa þurft að sæta ofsóknum í Mjanmar, þar sem búddistar eru í meirihluta, frá árinu 2017. Því hefur talsverður fjöldi fólks lagt á flótta frá landinu.
Fleiri en milljón Róhingjar búa í flóttamannabúðum í Suður-Bangladess.