Senda Abrams-skriðdreka til Úkraínu
Stefán Gunnar Sveinsson
Setja bókamerki
Bandaríkjastjórn mun senda 31 orrustuskriðdreka af gerðinni M1 Abrams til Úkraínu. Ákvörðunin kemur í kjölfar þess að Þjóðverjar ákváðu að senda Leopard 2A6-skriðdrekann til átakasvæðanna.
Joe Biden Bandaríkjaforseti tilkynnti formlega um ákvörðunina í ávarpi um kl. 17 að íslenskum tíma. Sagði hann þar að Abrams-skriðdrekinn væri sá færasti í heiminum. Biden sagði jafnframt að Bandaríkin myndu sjá um þjálfun og viðhald á skriðdrekunum, en hann þykir frekar flókinn í rekstri. Hann gengur til að mynda fyrir þotueldsneyti.
Undirbúningurinn fyrir notkun Abrams-skriðdrekanna gæti tekið nokkra mánuði, auk þess sem gert er ráð fyrir að þeir komi ekki beint frá núverandi birgðum Bandaríkjahers.
Með öflugri orrustuskriðdrekum
Frumgerð Abrams-skriðdrekans var tekin í notkun árið 1980 og hefur hann verið uppfærður nokkrum sinnum síðan þá. Núverandi útgáfa hans var tekin í notkun um 1990. Hann er búinn annað hvort 105 mm eða 120 mm fallbyssu, sem og tveimur 7,62 mm vélbyssum og einni vélbyssu sem er 12,5mm sem foringi skriðdrekans getur skotið án þess að opna topplúgu hans.
Vél skriðdrekans er 1.500 hestöfl og sumar gerðir skriðdrekans geta farið á allt að 72 kílómetra hraða. Skriðdrekinn nýttist Bandaríkjamönnum mjög vel í Persaflóastríðinu sem og Íraksstríðinu.
Auk Abrams-skriðdrekans ætla Bandaríkjamenn að senda 90 Stryker-brynvagna og 109 Bradley-vagna. Þjóðverjar hafa þegar tilkynnt að þeir muni senda 40 Marder-bryndreka auk Leopard 2-skriðdrekans. Áður höfðu Bretar lofað að senda 14 Challenger 2-orrustuskriðdreka, og Frakkar munu senda AMX-10 RC-léttskriðdreka.
„Þú munt sjá hundruð brynvarinna farartækja, mjög framúrskarandi farartækja, og skriðdreka í Úkraínu. Og það sem skiptir máli, þau verða með þjálfaðar áhafnir,“ sagði háttsettur embættismaður í bandaríska varnarmálaráðuneytinu við AFP-fréttastofuna.
Myndskeið: Segjast hafa skotið niður sprengjuflugvél
Nauðgaði kærustu sinni og tók það upp
Vill engin tímamörk á fóstureyðingum
Segjast ekki vera á kaldri slóð
Mikilvægt að vera á tánum
Gerir ráð fyrir 150 samningum í næstu viku
Almannavarnir auka viðbúnað