Bandaríska varnarmálaráðuneytið hefur greint frá því að annar loftbelgur, að öllum líkindum kínverskur njósnaloftbelgur hafi sést fljúga yfir Suður-Ameríku á föstudag. Daginn áður var greint frá því að slíkur loftbelgur hefði flogið yfir norðvesturhluta Bandaríkjanna þar sem eru flugstöðvar hersins og kjarnorkueldflaugar í neðanjarðarsílóum.
Sá loftbelgur flaug inn í lofthelgi Bandaríkjanna á þriðjudag en leyniþjónusta Bandaríkjanna hafði verið að fylgjast með honum töluvert áður en það gerðist.
„Við höfum gögn um að loftbelgur sé á flugi yfir Suður-Ameríku. Við gerum ráð fyrir því að um sé að ræða annan kínverskan njósnaloftbelg,“ sagði Pat Ryder, talsmaður varnarmálaráðuneytisins, í yfirlýsingu. Ekki var þó greint frá nákvæmri staðsetningu loftbelgsins.
Kínverjar vísuðu því á bug í gær að loftbelgurinn sem sást yfir Bandaríkjunum væri njósnaloftbelgur. Utanríkisráðneyti Kína sagði í tilkynningu að loftbelgurinn væri í eigu óbreyttra borgara og væri notaður í vísindarannsóknum. Hann hefði óvart flogið inn í bandaríska lofthelgi.
Antony Blinken, utanríkisráðherra Bandaríkjanna, frestaði fyrirhugaðri helgarheimsókn til Peking eftir að loftbelgurinn sást í bandarískri lofthelgi. Mun Blinken hafa tjáð æðsta embættismanni utanríkismála í Kína að staðsetning loftbelgsins væri óásættanleg.