„Sýrlensk börn geta ekki beðið lengur“

Mæðgin í flóttamannabúðum sækja sér vatn.
Mæðgin í flóttamannabúðum sækja sér vatn. Ljósmynd/UNICEF

Milljónir sýrlenskra barna eru í stóraukinni hættu á vannæringu samkvæmt fréttatilkynningu frá UNICEF, barnahjálp Sameinuðu þjóðanna.

Í dag eru tólf ár síðan stríðið í Sýrlandi hófst og ekkert lát er á átökum stríðandi fylkinga í landinu. Stórir jarðskjálftar í febrúar hafa enn aukið neyð almennings.

Líf á bláþræði

„Sýrlensk börn geta ekki beðið lengur,“ segir Adele Khodr, svæðisstjóri UNICEF í Mið-Austurlöndum og Norður-Afríku.

„Eftir áralöng stríðsátök og tvo skelfilega jarðskjálfta hangir framtíð milljóna barna á bláþræði. Það er á sameiginlega ábyrgð okkar allra að sýna þessum börnum að framtíð þeirra skiptir máli og sé líka okkar forgangsatriði.

Við verðum að bregðast við þörfum barna hvar sem þau eru í Sýrlandi og styðja við þau kerfi sem veita þá mikilvægu þjónustu sem þau þurfa svo nauðsynlega á að halda,“ segir Khodr.

UNICEF hefur lagt áherslu á að tryggja hreint drykkjarvatn frá …
UNICEF hefur lagt áherslu á að tryggja hreint drykkjarvatn frá upphafi átaka. Ljósmynd/UNICEF

Átök og jarðskjálftar aukið á neyð

Til þessa dags hafa nærri 13 þúsund börn látið lífið og særst í átökunum í Sýrlandi ef marka má tölur frá Sameinuðu þjóðunum. Heil kynslóð barna hefur verið svipt barnæsku sinni og þekkir ekkert annað en átök, ótta og sífelldan flótta undan árásum.

Áætlað er að rúmlega 600 þúsund sýrlensk börn undir fimm ára aldri glími við vaxtarröskun vegna langvarandi vannæringar. Eitthvað sem getur haft óafturkræf áhrif á líkamlegan- og andlegan þroska þeirra. Þá hefur tíðni bráðavannæringar sömuleiðis aukist.

Tilfellum alvarlegrar bráðavannæringar hjá börnum frá 6 mánaða aldri og að fimm ára aldri fjölgaði um 48 prósent milli áranna 2021 og 2022. Vannæring af því tagi veikir ónæmiskerfi barna og eru þau ellefu sinnum líklegri til að láta lífið vegna ýmissa veikinda en ella.

Efnahagur landsins er í molum vegna hinna langdregnu átaka en um 90 prósent íbúa lifa nú í fátækt. Verst koma efnahagsþrengingarnar niður á velferð og réttindum barna.

Systkin leita skjóls eftir jarðskjálftana.
Systkin leita skjóls eftir jarðskjálftana. Ljósmynd/UNICEF

Næringarkrísa og heilbrigðiskerfi í molum

Fyrir jarðskjálftana stóru í febrúar þurftu ríflega 3,7 milljónir sýrlenskra barna á næringaraðstoð að halda og nærri 7 milljónir á mannúðaraðstoð að halda.

Fyrir hamfarirnar skorti einnig ríflega 6,8 milljónir sýrlenskra barna aðgengi að grunnheilbrigðisþjónustu.

Ljóst er að neyðin eftir hamfarirnar hefur stóraukist. Ofan á öll þessi ósköp bættist síðan kólerufaraldur síðastliðið haust sem enn hefur sett aukið álag á brothætt heilbrigðiskerfið. UNICEF býst við því að aðgengi að heilbrigðisþjónustu muni versna enn á þessu ári.

Aldrei fleiri börn þurft á aðstoð að halda

UNICEF, Barnahjálp Sameinuðu þjóðanna, vinnur þrotlaust að því ásamt samstarfsaðilum að bæði greina vannæringu barna tímanlega sem og að veita og auka við lífsbjargandi meðferðarþjónustu við vannærð börn.

UNICEF útvegar einnig mikið magn hjálpargagna, sjúkragagna og heilbrigðisþjónustu, aðgengi að hreinu vatni og hreinlætisþjónustu til að auka lífslíkur barna í neyð.

Löngu áður en núverandi átök hófust í Sýrlandi fyrir tólf árum og allar götur síðan hefur UNICEF verið á vettvangi og til staðar fyrir sýrlensk börn en aldrei fyrr hafa fleiri börn þurft á aðstoð að halda.

UNICEF á Íslandi hefur frá upphafi átakanna haldið úti neyðarsöfnun fyrir börn í Sýrlandi.

Hægt er að styðja við verkefni UNICEF í þágu sýrlenskra barna hér.

mbl.is
Fleira áhugavert
Fleira áhugavert