Bandaríski herinn greindi frá því í morgun að háttsettur leiðtogi hryðjuverkasamtakanna Ríki íslams hafi verið drepinn í árás hersins í Sýrlandi í gær.
Maðurinn hét Khalid Aydd Ahmad al-Jabouri og skipulagði hryðjuverk samtakanna í Evrópu.
Í yfirlýsingu hersins kom ekki fram hvar í Sýrlandi árásin varð en enga almenna borgara sakaði.
Hryðjuverkasamtökin eru enn starfandi þó að liðsmenn þeirra hafi hrökklast frá síðasta yfirráðasvæði sínu í Sýrlandi árið 2019.
Herforinginn Michael Kurilla segir að Ríki íslams hafi enn burði til að gera árásir utan Mið-Austurlanda.
Í yfirlýsingu hersins sagði að al-Jabouri hafi þróað stjórnarskipulag samtakanna og að dauði hans muni hafa tímabundin áhrif á getu samtakanna til að skipuleggja árásir.
Árið 2019 lést Abu Bakr al-Baghdadi, fyrrum leiðtogi samtakanna, er bandarískir sérsveitarmenn eltu hann uppi.
Íslamska ríkið stóð meðal annars að baki hryðjuverkunum í París í nóvember árið 2015 þar sem 130 létust og í Nice í júlí árið 2016 er 86 létu lífið.
Um 900 bandarískir hermenn eru starfandi í Sýrlandi, flestir í héruðum Kúrda í norðausturhluta landsins.