Maður sem fannst slasaður í kjölfar skotárásar í Stokkhólmi í dag hefur verið handtekinn og er grunaður um morð.
Greint var frá því í dag að einn hafi látist í skotárás í Hagalund í Stokkhólmi og annar slasast. Sænska dagblaðið Aftonbladet greinir frá því að hinn slasaði hafi verið fluttur á sjúkrahús til aðhlynningar í kjölfar árásarinnar en hafi nú verið handtekinn vegna gruns um morð.
Blaðið segir að maðurinn sem lést hafi verið um 35 ára aldur en sá slasaði sé á þrítugsaldri.
Skothvellir heyrðust rétt eftir klukkan 17 að staðartíma í dag (kl. 15 að íslenskum tíma). Heyrnarvottur segist hafa heyrt 7-8 hvelli í röð en sjálfvirkt skotvopn fannst í runna á vettvangi, samkvæmt heimildum sænska fjölmiðilsins.
Einn annar einstaklingur hefur verið handtekinn vegna árásarinnar.