Malasísk stjórnvöld hafa lagt hald á kínverskt skip en áhöfn þess er grunuð um að hafa látið greipar sópa um tvö skipsflök úr síðari heimsstyrjöldinni.
BBC greinir frá því að lagt hafi verið hald á flutningaskipið í gær fyrir að setja niður akkeri við skipsflökin í Suður-Kínahafi. Fallbyssuskot úr bresku skipunum HMS Prince of Wales og HMS Repulse fundust um borð í flutningaskipinu.
Orrustuskipinu HMS Prince of Wales og orrustubeitiskipinu HMS Repulse var sokkið við strendur Malasíu fyrir meira en 80 árum og hvíla þar um 840 breskir sjóliðar í votri gröf. Flökin eru viðurkenndar stríðsgrafir og því óheimilt að hrófla við þeim.
Í yfirlýsingu varnarmálaráðuneytis Bretlands er ránið fordæmt og segir þar að um vanvirðingu við grafir sjóliðanna sé að ræða.
Málmur skipsflakanna er eftirsóttur þar sem litla geislun er að finna í honum. Því er um að ræða sjaldgæfan og verðmætan málm til notkunar í lækninga- og vísindatækjum.
Kínverska flutningaskipið er skráð í borginni Fuzhou og voru 32 í áhöfn er malasíska landhelgisgæslan lagði hald á það.