Þriggja ára gamall palestínskur drengur, Mohammed Tamimi, lést eftir að hann varð fyrir skoti í höfuðið frá ísraelskum hermönnum.
Mohammed og faðir hans voru á leið út af heimili sínu í Nabi Saleh-hverfinu á Vesturbakkanum, þegar skothríð braust út fyrir utan heimilið. Að sögn ísraelskra hermanna var herinn að eltast við tvo vopnaða menn, sem höfðu skotið á nærliggjandi landnámsbyggð Ísraelsmanna, Halamish, eða Neveh Tzuf.
Palestínski aðgerðasinninn og blaðamaðurinn Bilal Tamimi, sem særðist einnig í skotárásinni, segir ísraelska herinn hafa setið um bíl við inngang Nabi Saleh-hverfisins, þar sem árásin átti sér stað, og skothríð hafi brotist út þegar bíllinn nálgaðist.
Í yfirlýsingu frá ísraelska hernum segir að herinn harmi það að hafa sært aðra en bardagamennina og að herinn gerði allt í valdi sínu til að koma í veg fyrir slík atvik.
Frá upphafi árs hafa 150 Palestínumenn látið lífið af völdum ísraelskra hersveita eða landtökumanna á Vesturbakkanum, Austur-Jerúsalem eða Gasa-svæðinu, þar á meðal óbreyttir borgarar og vígamenn. Alls hafa 23 manns látist á hlið Ísraelsmanna, þar á meðal tveir útlendingar og einn palestínskur verkamaður.
Á báðum hliðum eru börn meðal hinna látnu, en Mohammed Tamimi er yngsti Palestínumaðurinn sem hefur látist á Vesturbakkanum.
Um 700.000 landnemar búa nú á Vesturbakkanum og Austur-Jerúsalem, en landtökur eru ólöglegar samkvæmt alþjóðalögum. Ísraelsmenn þvertaka hins vegar fyrir ólögmæti landtökunnar.