Söngvari Rammstein hafnar öllum ásökunum

Till Lindemann, aðalsöngvari þýsku þungarokkshljómsveitarinnar Rammstein, þvertekur fyrir allar ásakanir á hendur sér um kynferðislegt ofbeldi. Fjöldi kvenna hefur á síðustu dögum stigið fram og sakað söngvarann um að hafa byrlað þeim ólyfjan og síðan sængað hjá þeim.

„Fjöldi kvenna hefur borið fram alvarlega ásakanir á hendur skjólstæðingi okkar,“ segir í tilkynningu frá þýsku lögfræðistofunni Schetz Bergmann, sem sér um mál Lindemanns. „Þessar ásakanir eru án vafa ósannar.“

Í tilkynningunni kemur einnig fram að konurnar sem stigið hafa fram verði lögsóttar.

Kallað eftir auknu öryggi á tónleikum

Írsk kona að nafni Shelby Lynn birti færslu á samfélagsmiðlum þar sem hún sagði að Lindemann, sem nú er sextugur, hefði byrlað fyrir sér í Vilníus í Litháen í maí. Þá hafi hún farið í veislu baksviðs eftir tónleika hljómsveitarinnar.

Eftir að hún sagði frá sinni reynslu kom í ljós að margar aðrar konur höfðu svipaða sögu að segja.

Hljómsveitin sjálf hefur einnig neitað ásökununum en hefur nú þurft að aflýsa öllum veislum eftir tónleika í München í þessari viku. Stjórnvöld í Berlín hafa einnig skipað hljómsveitinni að aflýsa öllum veislum eftir tónleikahald í borginni í júlí og fjölskyldumálaráðherra Þýskalands hefur kallað eftir auknu öryggi á tónleikum.

• Blogga um frétt