Stærsti kafbátur er heimsótt hefur Noreg

Það var í gærmorgun, fimmtudagsmorgun, sem stærsti kafbátur, er nokkru sinni hefur heimsótt Noreg, kom til hafnar í Tromsø, hinn bandaríski USS Florida, 171 metra langt stríðsfley sem borið getur allt að 154 Tomahawk-flaugar ætlaðar til árásar á skotmörk á landi.

USS Florida er kjarnorkukafbátur í Ohio-byggingarflokki og staðfesti aðstoðarskipherrann Stephen Mack á blaðamannafundi um borð í spænsku freigátunni ESPS Alvaro de Bazan að kafbáturinn sé sá stærsti sem nokkru sinni hafi heimsótt norska höfn.

USS Florida er stærsti kafbátur sem nokkru sinni hefur heimsótt Noreg, 171 metra langur og getur borið vel á annað hundrað Tomahawk-flaugar til árása á skotmörk á landi. Ljósmynd/Sjóher Bandaríkjanna/Christine Montgomery

„Það gleður okkur að Noregur taki á móti USS Florida. Meðan á dvöl okkar hér stendur fáum við ýmsa góða gesti um borð. Heimsókn okkar til Tromsø er enn fremur staðfesting á sambandi Bandaríkjanna og Noregs,“ sagði Mack á blaðamannafundinum en einn gestanna sem hann nefndi verður norski varnarmálaráðherrann Bjørn Arild Gram sem þiggur heimsókn um borð á mánudaginn.

Stöðugleiki tryggður

„Varnir Noregs byggjast á stuðningi bandalagsríkja er til neyðarástands og stríðs kemur. Til þess að slíkt megi kallast trúverðugt og geti virkað við raunverulegar aðstæður er nauðsynlegt að bandamenn okkar þjálfi og æfi í Noregi og á nálægum svæðum með norskum her. Þess vegna hlakka ég til að heimsækja USS Florida og mannskapinn um borð,“ segir Gram í samtali við norska ríkisútvarpið NRK.

Að sögn sendiherra Bandaríkjanna í Noregi, Marc Nathanson, er hér um hefðbundna heimsókn að ræða. „Heimsóknir kafbáta eru hluti af löngum samstarfstíma okkar og Noregs með það fyrir augum að tryggja stöðugleika á svæðinu,“ segir sendiherra.

Lætur hann þess enn fremur getið að Healy, stærsta strandgæsluskip Bandaríkjanna, komi til Tromsø í október. Er Healy um 130 metrar á lengd og er auk þess ísbrjótur, einn þeirra fullkomnustu sem Bandaríkin hafa á að skipa.

Nyrsti fasti viðverustaðurinn

Áður en árið er úti stendur til að Bandaríkjamenn opni sendierindrekaskrifstofu í höfuðborg Norður-Noregs, Tromsø, en hana boðaði Anthony Blinken, utanríkisráðherra Bandaríkjanna, við heimsókn sína til Noregs í júní. Er skrifstofunni ætlað að tryggja samstarf ríkjanna sem að sögn Blinkens er norðurslóðum mikilvægt. Skrifstofan verður nyrsti fasti viðverustaður bandarískrar stjórnsýslu í heiminum.

Fjöldi bandarískra herfleyja heimsækir Tromsø jafnan árlega og við sjóheræfinguna Flortex 22 í fyrra voru herskip margra bandalagsríka á norsku hafsvæði. Þá er skammt að minnast heimsóknar stærsta herskips heims, flugmóðurskipsins USS Gerald R. Ford, til Óslóar og Tromsø í sumar meðan á flugheræfingunni Arctic Challenge Exercise stóð.

NRK

The Barents Observer

Navy.mil

• Blogga um frétt